Wabunge wapigwa, CCM yapeta udiwani

Mchumi wa CCM, Wilaya ya Mbeya Vijijini, Shadrack Mwanjuguja akidhibitiwa na vijana baada ya kutokea vurugu jana asubuhi katika Kijiji cha Ruanda2 wakati wa uchaguzi mdogo wa udiwani Kata ya Santilya, Mbeya Vijijini. Picha ndogo ni Mkuu wa Polisi Kituo cha Kati, Mbeya, Richard Mchomvu akimsindikiza hospitali Mbunge wa Mbeya Vijijini (CCM), Mchungaji Lackson Mwanjale baada ya kujeruhiwa katika kata hiyo. Picha na Godfrey Kahango 

Wabunge wawili, mmoja wa CCM na mwingine wa Chadema, jana walikula vichapo walipokuwa katika harakati za uchaguzi mdogo wa madiwani uliofanyika katika kata 27 nchini. Wabunge hao, Godbless Lema (Chadema) wa Arusha na Mchungaji Jackson Mwanjele wa Mbeya Vijijini walipata vipigo katika matukio tofauti yanayohusiana na uchaguzi huo. 

Lema alidai kuwa alinusurika kifo kutokana na kipigo alichokipata kutoka kwa polisi na ilibidi aanguke chini na kujifanya amezirai ili kujiokoa, katika tukio lililotokea jana jioni, eneo la Shule ya Sombetini alipokuwa akielekea katika kituo cha kupigia kura.Mara baada ya kufika jirani na kituo cha Sombetini, inadaiwa kuwa polisi walisimamisha gari ya Lema na kuanza kumuhoji lakini ghafla ilitokea kutoelewana kipigo kuanza. Katika tukio hilo, Lema alipata kipigo hadi kuangukia katika mfereji na akiwa chini, alionekana kama amezimia hivyo polisi walimuachia na kuokolewa na wafuasi wa Chadema.

Akizungumza baada ya tukio hilo, Lema alisema bila kujifanya amezirai angeweza kuuawa... “Wamenipiga sijui kosa langu, mimi kama mbunge niliitwa na mawakala wakiomba gari kubeba masanduku na ni kweli nilikuwa nimewasha taa za gari nikishangilia. Kesho naenda kupimwa hospitali kwani nina maumivu kwenye mbavu. Baada ya hapo nitajua cha kufanya kwani walionipiga nawajua.”

Kamanda wa Polisi Mkoa wa Arusha, Liberatus Sabas hakupatikana jana kuelezea tukio hilo lakini mmoja wa polisi waliokuwa eneo la vurugu hizo, alisema walilazimika kimdhibiti Lema, kwani alikuwa anafanya fujo jirani na kituo cha kura.

“Hakuna aliyempiga, alianguka mwenyewe kwenye mfereji, tulimtaka aondoke kwa amani akagoma,” alisema askari huyo.

Mbeya Vijijini - Mchungaji Mwanjale kwa upande wake, aliumizwa baada ya kupigwa na kundi linalodaiwa kuwa la wafuasi wa Chadema, katika Kitongoji cha Shipongo, Kijiji cha Ruanda, Mbeya wakati yeye na makada wengine wa CCM walipofika hapo wakiwa kwenye gari la chama hicho.

Mbunge huyo alivuja damu nyingi kichwani na mashuhuda wa tukio hilo walisema kabla ya kupigwa, kulikuwa patashika baina ya walinzi wa CCM na wale wa Chadema waliokuwa wakilinda kura katika uchaguzi huo.

Mchungaji Mwanjale inaelezwa kuwa alijiokoa baada ya vijana hao walipomwacha na kuanza kumshambulia Mchumi wa CCM, Wilaya ya Mbeya Vijijini, Shadrack Mwanjuguja ambaye alikuwa amefuatana naye.

Baada ya kuponyoka, Mwanjale alikimbilia kwenye nyumba moja iliyopo karibu na vijana hao walimfuata na kugonga kwa nguvu ili waingie ndani, lakini alitoroka kupitia mlango wa nyuma kisha kuruka uzio wa nyumba hiyo huku Mwanjuguja akiwekwa chini ya ulinzi.

Mbunge huyo na mwenzake waliokolewa na polisi wa doria waliokuwa wakiongozwa na Mkuu wa Polisi wa Wilaya (OCD) Mbeya, Richard Mchomvu ambaye aliwachukua na kuwapeleka Kituo cha Afya Kilembo kwa ajili ya matibabu.

Daktari wa kituo hicho, Franco Anthony alisema Mchungaji Mwanjale alipigwa na kitu kizito kichwani na kushonwa nyuzi tatu huku mwenzake Mwanjuguja akishonwa nyuzi mbili kichwani.

Baada ya kupata matibabu walikwenda Kituo cha Polisi Mbalizi kufungua jalada la mashtaka. Kamanda wa Polisi wa Mkoa wa Mbeya, Ahmed Msangi alisema watu saba walikamatwa kwa tuhuma za kuhusika na tukio hilo.

Vurugu Bagamoyo - Vurugu ziliibuka katika uchaguzi mdogo wa udiwani Kata ya Magomeni, Bagamoyo na kusababisha polisi kutumia mabomu ya machozi baada ya watu wanaodhaniwa ni wafuasi wa vyama vya CUF na Chadema kuwashambulia wa CCM.

Katika vurugu hizo zilizotokea saa mbili asubuhi, inadaiwa zaidi ya wafuasi 15 wa CCM walijeruhiwa na kulazwa katika Hospitali ya Wilaya ya Bagamoyo.

Mkuu wa Wilaya ya Bagamoyo, Ahmed Kipozi alithibitisha kutokea kwa tukio hilo na kwamba kuwa watu kadhaa walikamatwa huku polisi wakiendelea na uchunguzi.

Lindi - Msimamizi wa Uchaguzi Kata ya Namikago, Wilaya ya Nachingwea, Valery Kwembe alimtangaza Alferd Mhagama wa CCM kuwa mshindi kwa kura 511 dhidi ya Hamisi Chingole wa Chadema (188),  Hamis Malipiche wa CUF (110) na Belisimas Mbinga wa ADC (1).

Katika Kata ya Kiwalala CCM imeibuka mshindi baada ya Sheneni Zahoro kupata kura 1,158 akifuatiwa na wa CUF, Shazil Mosha 803 na Mboga Hassan wa Chadema 90.

Moshi - Katika Kata ya Kiborloni, Moshi, Msimamizi Msaidizi wa Uchaguzi, Erasmo Silayo alimtangaza Frank Kagoma wa Chadema kuwa mshindi kwa kupata kura 1,019 dhidi ya 255 za Willy Tulli wa CCM. Mgombea wa UDP, Aidan Mzava aliambulia kura mbili.

Iringa - Kata ya Ibumu, (Iringa), Msimamizi Msaidizi wa Uchaguzi, Justine Mgina alimtangaza Hemed Mbena wa CCM kuwa mshindi kwa kura 891 dhidi ya kura 338 za July Petro wa Chadema.

Tanga - Msimamizi wa Uchaguzi, Juliana Malange alimtangaza mgombea wa CCM, Kauli Makame kuwa ameshinda Kata ya Kiomoni kwa kura 857 dhidi ya mgombea CUF Mwaruko Omary aliyepata kura 451 wakati mgombea wa Chadema Mwanaisha Omary alipata kura 132.

Katika Kata ya Mtae Lushoto, mgombea wa CCM Hamza Mohamed amepita bila kupingwa baada ya wagombea wa vyama vingine kujitoa.

Njombe Mjini - Mgombea wa Chadema katika Kata ya Njombe Mjini hiyo, Agrey Mtambo aliibuka kidedea kwa kupata kura 2,202 dhidi ya mpinzani wake wa CCM Menard Mlyuka aliyepata kura 1,094.

Kiteto - Msimamizi Msaidizi wa  Uchaguzi Kata ya Partimbo, Kiteto- Arusha, Nevil Kimolo alimtangaza mgombea wa  CCM, RaphaelNangole kuwa mshindi wa kura 837 dhidi ya mpinzani wake wa karibu kutoka Chadema Saning’o Kornei aliyepata kura 587.

Mbeya - Msimamizi Msaidizi wa Uchaguzi Kata ya Malindo, Stephen Mwakingwe alimtangaza mgombea wa CCM, Nelson Mwaikambo kuwa mshindi kwa kura 747 dhidi ya Nicodemus Mwakalile wa Chadema aliyepata kura 408 wakati mgombea wa TLP, Raphael Mwakabanga alipata kura 51.

Mbeya Vijijini - Katika Kata ya Santilya, Msimamizi wa Uchaguzi, Raphael Mwangunga alimtangaza mgombea wa CCM, Anthony Mboma kuwa mshindi kwa kura 1,650 na kumshinda Elisha Mwandele wa Chadema aliyepata kura 1,154.

Shinyanga - Katika matokeo ya udiwani Kata ya Ubwage, Hamisi Majogoro wa CCM ameibuka kidedea baada ya kupata kura 323 akifuatiwa na Adam Ngoma wa Chadema aliyepata kura 219 na Majika Lubinza wa Tadea aliyepata kura 95.

Morogoro - Mgombea wa CCM, Mzelu Paul aliibuka mshindi kwenye Kata ya Tungi baada ya kuwashinda wagombea watano. Msimamizi Msaidizi wa Uchaguzi huo, Jelvis Simbeye alisema Mzelu alipata kura 715 akifuatiwa na Tembo Abdul (Chadema) aliyepata kura 416, Felista Yohana (CUF) 54, Mussa Kimonge (SAU) 2, Mwandule Abdul (UDP) 2 na Ismail Ismail (Jahazi Asilia) ambaye hakupata kura yoyote.

Mara - Msimamizi Msaidizi wa Uchaguzi wa Kata ya Nyasura, Mara, Simon Mayeye alimtangazaAlexander Mwikabe wa CCM kuwa ameshinda baada ya kuzoa kura 966, akifuatiwa na Julius Wassira (Chadema) kura 590, Asetic Matagira (NCCR-Mageuzi) 3, David Waryoba (NLD) 1.

Iringa - Msimamizi Msaidizi wa Uchaguzi wa Kata ya Nduli, Iringa Simba Nyunza alimtangaza Basil Mtove wa CCM kuwa mshindi baada ya kuzoa kura 810 wakati Abdallah Mwenda wa Chadema alishika nafasi ya pili baada ya kupata kura 491.

Tandahimba - Msimamizi wa Uchaguzi Tandahimba wa Kata ya Mkwiti, Mtwara, Abdallah Njovu alimtangaza Arafa Nakatanda (CCM) kuwa mshindi baada ya kupata kura 615 akifuatiwa na Abdallah Chiute wa CUF aliyepata kura 213 wakati Kawango Mohamed wa Chadema alikuwa wa tatu kwa kura 76.

Dodoma - Msakati Hassan wa CCM aliibuka mshindi kwenye uchaguzi wa Kata ya Mirijo, Dodoma baada ya kupata kura 1,261.

Msimamizi wa uchaguzi huo, Dk WilliamMaswere alisema Bakari Saidi wa CUF alikuwa wa pili kwa kura 904 akifuatiwa na Duka Salim (Chadema) kura 248, Juma Awadi (NCCR-Mageuzi) alipata kura 17.

Arusha - Mgombea wa Chadema, Ally Bananga aliibuka mshindi Kata ya Sombetini, Arusha baada ya kupata kura 2,564 . Mgombea wa CCM, David Mollel alipata kura 2,068 huku mgombea wa CUF Ally Mkali  akipata kura 37.

Morogoro - Subiri Mwandila wa CCM amechaguliwa kuwa Diwani wa Kata ya Rudewa, Kilosa- Morogoro baada ya kupata kura 1,336 akiwashinda Evans Mwanisenga (Chadema) aliyepata kura 698 na Yakwasi Mwasonganga (CUF) aliyepata kura 36.

Bagamoyo - Jarusu Hamisi wa CCM aliibuka mshindi kwenye Uchaguzi wa Kata ya Magomeni, Bagamoyo Pwani baada ya kupata kura 1,192. akifuatiwa na Mohamed Seif (CUF) aliyepata 710  na Ligangwala Stanslaus (Chadema) 327.  

Katika Kata ya Kibindu, Bagamoyo CCM kiliibuka kidedea baada ya kuzoa kura 1,213 dhidi ya 562 za Chadema.

Kilelema, Kigoma - Kiola Norbet wa NCCR-Mageuzi aliibuka kidedea kwenye uchaguzi wa udiwani wa Kata ya Kilelema, Buhigwe Kigoma kwa kupata kura 1,204 akifuatiwa na William Abel (CCM) aliyepata kura 1050, Aaron Chisheko (Chadema) 449.

Chanzo - Mwananchi