WANAWAKE WAWILI WAKAMATWA NA DAWA ZA KULEVYA ZA MABILIONI

Christopher Shekiondo

Dawa za kulevya aina ya Crystal Methamphetamine zenye thamani ya zaidi ya Sh. bilioni 6.8 zimekamatwa nchini Afrika Kusini wakati zikisafirishwa kutoka Tanzania.

Kwa mujibu wa taarifa zilizopatikana kutoka nchini humo,  wanawake wawili walikamatwa katika uwanja wa ndege wa kimataifa wa Oriver Tambo uliopo eneo la Kempton Park siku ya Ijumaa wiki iliyopita wakitokea Tanzania.

Wanawake hao walikamatwa wakiwa na mabegi sita ambayo yalipokaguliwa yalikutwa na kilo 150 za dawa hizo ambazo pia zinajulikana kama ‘Tik’.

Baada ya kukamatwa na dawa hizo wanawake hao walikabidhiwa polisi.

Mwenyekiti wa Tume ya Kuthibiti Dawa za Kulevya, Christopher Shekiondo, alipotafutwa alisema hajapata taarifa hizo na aliahidi kufuatilia.

"Sijapata taarifa za tukio hilo lakini nitafuatilia kujua kama kweli wanawake walitoka Tanzania," alisema Shekiondo. 

Hivi karibuni Waziri Mkuu, Mizengo Pinda, katika taarifa yake ilisomwa kwa niaba yake na Waziri wa Nchi, Ofisi ya Waziri Mkuu (Sera, Uratibu na Bunge), William Lukuvi, mjini Dodoma, katika maadhimisho ya kitaifa ya ‘Siku ya Kupiga Vita Dawa za Kulevya Duniani’ alisema tatizo la dawa hizo ni janga la kitaifa hivi sasa nchini.

Alisema kumekuwa na wimbi kubwa la Watanzania wanaojiingiza katika biashara haramu ya dawa za kulevya ndani na nje ya nchi na kwamba, katika kipindi cha miaka mitano iliyopita, watuhumiwa 10,799 walikamatwa kwa kujihusisha na dawa hizo.

Endelea kusoma habari hii kwa kubofya hapa chini

Pia alisema katika kipindi hicho, Watanzania 240 walikamatwa katika nchi za Brazil, Pakistan na Afrika Kusini, kuharibu taswira ya nchi na kusababisha Watanzania wasio na hatia kupata usumbufu na masharti magumu wanapotaka kusafiri kwenda nchi mbalimbali duniani.

Alisema mwaka huu pekee kumekuwa na ukamataji mkubwa wa dawa za kulevya katika eneo la kimataifa la Bahari ya Hindi karibu na Tanzania.

Pinda alisema hivi sasa mikate, maandazi na askrimu zinazouzwa kwenye shule za msingi, zinawekwa dawa za kulevya.

Alisema  vitendo hivyo vinafanya vijana wengi wa shule za msingi na hata sekondari kuwa na tabia za ajabu, ikiwamo kuingia darasani wakiwa na kiatu kimoja mguuni, mkufu wenye nyembe na kidani chenye nyembe kifuani.

CHANZO: NIPASHE