Serikali ya Tz haijui inachopigania katika Ziwa Nyasa-Waziri

 

Serikali ya Malawi imesema itaendelea na mazungumzo na Tanzania kuhusu mpaka licha ya kuwa viongozi wa Tanzania hawaelewi mipaka ndiyo maana wanapigania kuwa wao ni sehemu ya ziwa. Waziri wa Habari wa Malawi, Moses Kunkuyu alisema wiki iliyopita alipohojiwa na Shirika la Utangazaji la Malawi (MBC) akisema viongozi wote wa Tanzania wanadhani wanamiliki Ziwa Malawi (Nyasa) lakini watakuja kubaini baadaye kuwa hawana hata tone la umiliki.

Msemaji huyo wa Serikali, alisema wanakubali kwenda kwenye meza ya majadiliano ya Tanzania na  Malawi kwani kufanya hivyo wanataka kuwaeleza ukweli kuhusu ziwa hilo kwani hawaelewi ukweli wake.

“Viwango vya uelewa kwa kitu chochote vinatofautiana. Tawala za Tanzania zilikuja zikaondoka, mawazo ya kumiliki Ziwa Malawi wanayo lakini itafikia hatua wataamini kuwa ni Ziwa la Malawi.

“Tunataka kutafuta utatuzi wa hili. Sisi tunafahamu kuwa wanapiga kelele tu lakini hawana wanachomiliki katika Ziwa Malawi na baada ya kukamilisha majadiliano, hakuna atakayekuja kuleta hoja nyingine,” alisema Kunkuyu akikaririwa na gazeti la Nyasa Times.

Itakumbukwa, Julai 29 mwaka jana, Waziri wa Mambo ya Nje na Ushirikiano wa Kimataifa, Benard Membe alitoa tamko la Serikali kuitaka Malawi kuacha mara moja mpango wake wa kutafuta mafuta na shughuli nyingine katika ziwa hilo.

Hata hivyo, Kankuyu alisema kuwa Malawi itaendelea kutafuta mafuta ziwani kama kawaida na mengine ya maendeleo yatafanyika kwa kuwa yote yako chini ya milki ya Malawi. Rais wa zamani wa  Msumbiji, Joachim Chissano ndiye aliyepewa jukumu la usuluhishi wa mgogoro huo.

“Sisi kama Serikali tuna mipango yetu ya maendeleo na hakuna nchi inayoweza kutuamrisha kwa kile tunachotaka kukifanya kwa hiyo kwa maendeleo ya kilimo, madini na utafutaji mafuta utafanyika kama ulivyopangwa,” alisema Kunkuyu ambaye nchi yake imepewa leseni ya utafutaji mafuta na Kampuni ya Uingereza ya Surestream.

Chanzo - Mwananchi