Askari Magereza waliohusishwa na ujangili watimuliwa

Kamishna Jenerali wa Magereza, John Casmir Minja

Jeshi la Magereza Tanzania Bara limewafukuza kazi askari watatu kwa kosa la kwenda kinyume na maadili ya jeshi hilo na kwamba watafikishwa mahakamani baada ya upelelezi kukamilika.

Askari hao watatu wa Magereza ni miongoni mwa watu  saba walikamatwa na na Kikosi cha Kuzuia Ujangili Kanda ya Kati, kwa kushirikiana na askari wa Wizara ya maliasili na Utalii, mkoani manyara kwa tuhuma za kukutwa na nyara za serikali zenye thamani ya sh. mili. 55.

Taarifa iliyotolewa na jeshi hilo jana Jijini Dar es Salaam na Kamishna Jenerali wa Magereza, John Casmir Minja, imesema kuwa hatua hiyo inafuatia uchunguzi wa awali kubaini ukiukwaji wa taratibu na maadili ya jeshi pamoja na sheria za uwindaji wa wanyamapori.

 Ilisema kuwa Julai 23, mwaka huu, maofisa wane ambao ni Mrakibu Msaidizi wa magereza, Joseph Kimaro, Sajenti Ketto Ramadhani, Koplp Silyvester Dionice na Warda Richard Barick wa gereza la Kiteto Manyara walikamatwa na kikosi cha kuzuia ujangili wakiwa na gari la Maereza pamoja na silaha. Gari hilo lilipakia nyara za serikali.

Kufuatia tukio hilo, hatua zilizochukuliwa ni kuwafukuza kazi maofisa watatu ambapo watafikishwa mahakamani upelelezi ukikamilika.

Taarifa imefafanua kuwa Afisa Mrakibu Msaidizi wa magereza, Joseph Kimaro amefunguliwa mashtaka ya nidhamu na kusimamishwa kazi kwa kosa la kwenda kinyume na maadili ya Jeshi la Magereza hadi maamuzi ya mamlaka ya kinidhamu inayomhusu yeye itakapotoa maamuzi dhidi yake.

Kwa sasa amezuiliwa kituo cha polisi BBabati kusubiri kufikishwa mahakamani uchunguzi utakapokamilika.

Aidha taarifa imesema kuwa Mkuu wa Gereza Kiteto, Mrakibu wa magereza Ally Ramadhani Sauko kwa kutumia madaraka yake vibaya, yeye amevuliwa uongozi na kuhamishiwa ofisi ya Mkuu wa Magereza Manyara, akisubiri maamuzi ya mamlaka ya kinidhamu inayomhusu yeye, kufuatia mashtaka ya kinidhamu yaliyofunguliwa dhidi yake.