DPP amvutia kasi Zombe

Serikali imesema inajipanga upya kurudi Mahakama ya Rufaa kupinga hukumu ya Mahakama Kuu Kanda ya Dar es Salaam iliyomwachia huru aliyekuwa Mkuu wa Upelelezi wa Makosa ya Jinai Mkoa (RCO) wa Dar es Salaam, Abdallah Zombe, na wenzake wanane, waliokuwa wakikabiliwa na tuhuma za kuhusika na mauaji ya raia wanne.

Hatua hiyo, ambayo imetangazwa na serikali jana, inachukuliwa zikiwa zimepita siku nane baada ya Mahakama ya Rufaa kushindwa kuendelea kusikiliza rufaa yake (serikali) ya kupinga hukumu hiyo.

Mahakama hiyo ilishindwa kuendelea na suala hilo baada ya kujiridhisha kuwa hakukuwa na rufaa, ambayo ingesikilizwa na kutolewa uamuzi, kutokana na taarifa ya kusudio la kuikata, kubainika kuwa ina dosari. 

Mkurugenzi wa Mashtaka (DPP), Eliezer Feleshi, aliliambia NIPASHE jana kuwa wakati wowote kuanzia sasa watarudi katika mahakama hiyo kuiomba kuisikiliza rufaa hiyo baada ya kuishughulikia.

“Amri ya Mahakama (ya Rufaa) iko wazi. Imeona kuna dosari. Sasa tunachukua hatua. Tunaandika nyaraka zetu kurudi mahakamani (Mahakama ya Rufaa),” alisema Feleshi.

Alipoulizwa lini watarudi mahakamani hapo, awali alijibu: “Hatuwezi kusema hilo kwenye magazeti.” Lakini baadaye, alisema: “Any time” (muda wowote).

Alisema haiwezekani kukaa kimya kuhusiana na rufaa hiyo.

Feleshi alisema iwapo katiba ingekuwa inafuatwa vizuri kuhusiana na mashauri makubwa, makosa madogo madogo kama hayo yasingekuwa ni sababu ya kukwamisha rufaa hiyo kufanyiwa kazi.

“Kulikuwa na makosa madogo madogo, badala ya kuandikwa Jaji Salum Massati wa Mahakama ya Rufaa ambaye wakati huo alikuwa Jaji Kiongozi wa Mahakama Kuu, Kanda ya Dar es Salaam, iliandikwa Jaji Salum Massati wa Mahakama ya Rufaa,” alisema Feleshi na kuongeza:

“Haya ni makosa madogo madogo. Lakini kama tungekuwa tunaifuatilia Katiba kuhusu masuala yahusuyo mashauri makubwa kama hayo, yasingeweza kukwamisha rufani hiyo. Watu watatu waliuawa, wajane wameachwa, yatima. Hatuwezi kukaa kimya, tutashughulikia rufani hiyo.” 

Alisema Jaji Massati wakati akitarajia kutoa hukumu alipewa taarifa ya kuhamishiwa katika Mahakama ya Rufaa, na kwamba alitoa hukumu hiyo akiwa tayari amehamishiwa katika mahakama hiyo.

Hata hivyo, hakutaja muda maalum wa kuipeleka rufaa hiyo tena mahakamani hapo baada ya kuifanyia marekebisho. 

“Siwezi kukuambia ni lini. Lakini naona neno zuri la kukuambia ni kwamba bado tunalishughulikia kwa ajili ya kupeleka mahakamani,” alisema Feleshi.

Uamuzi wa kutupilia mbali rufaa hiyo, ulitolewa na jopo la majaji watatu wa Mahakama ya Rufaa.

Kasoro ambayo mahakama hiyo iliibaini kuwamo kwenye taarifa hiyo, ni ya kumtaja Jaji Salum Massati, aliyetoa hukumu iliyowaachia huru Zombe na wenzake, kuwa wakati alipotoa hukumu hiyo, alikuwa ni Jaji wa Mahakama ya Rufaa, wakati usahihi alikuwa ni Jaji Kiongozi.

Awali, baada ya Mahakama ya Rufaa kubaini kasoro hiyo, upande wa Jamhuri uliomba uruhusiwe kuifanyia marekebisho taarifa yao.

Lakini katika uamuzi wake wa Mei 8, mwaka huu, mahakama hiyo ilisema haiwezekani kufanya marekebisho katika kitu, ambacho hakipo.

Uamuzi huo ulisomwa na Naibu Msajili wa Mahakama hiyo, Elizabeth Mkwizu, na kuunga mkono pingamizi lililowekwa awali na mawakili wa wajibu rufani (Zombe na wenzake).

Mkwizu alisema DPP, ambaye ndiye alikuwa mwombaji rufaa, alipaswa kutoa taarifa ya kusudio la kukata rufaa iliyo sahihi kwa kuwa ndiyo inayotengeneza rufaa.

Kutokana na hali hiyo, alisema hukumu ya Jaji Massati ilikuwa ya haki na halali na kwamba, ilitolewa na jaji sahihi kwani wakati ule alikuwa bado hajaripoti Mahakama ya Rufaa.

Hata hivyo, alisema upande wa Jamhuri una haki na nafasi ya kufungua upya jalada lingine kuhusu ‘rufaa’ yao kwa kuzingatia sheria ya ukomo wa muda.

Jopo la majaji wa ‘rufaa’ hiyo namba 254/2009 walikuwa ni Edward Rutakangwa, Mbarouk Mbarouk na Betheka Mila.

Mwombaji rufaa (DPP) aliwakilishwa na mawakili; Vitalis Timon, Prudence Rweyongeza, Mgaya Mtaki, Alexander Mzikila na Edwin Kakoraki.

Wajibu rufaa waliwakilishwa na mawakili; Richard Rweyongeza, Majura Magafu na Denis Msafiri.

Rufaa hiyo ilikatwa na DPP, Oktoba 7, mwaka 2009, baada ya kutoridhishwa na hukumu hiyo.

Alidai upande wa Jamhuri ulishindwa kuleta ushahidi uliojitosheleza, ambao ungeweza kuishawishi mahakama hiyo iwaone washtakiwa hao wana hatia.

Awali, rufaa hiyo ilipangwa kusikilizwa mwishoni mwa mwezi uliopita, lakini ilishindikana baada ya mahakama hiyo kubaini dosari hiyo.

Hukumu ya kuwaachia huru Zombe na wenzake, ilitolewa na Jaji Massati, Agosti 17, mwaka 2009, kabla ya kuhamishwa Mahakama ya Rufaa.

Katika hukumu hiyo, Jaji Massati alisema amefikia uamuzi huo baada ya upande wa Jamhuri kushindwa kupeleka ushahidi wa kutosha mahakamani kuthibitisha mashtaka dhidi ya Zombe na wenzake kwamba, walihusika na mauaji.

Mbali na Zombe, wengine waliokuwa wakikabiliwa na mashtaka hayo, walikuwa ni Christopher Bageni, Ahmed Makele, WP 4593 PC Jane Andrew, D 1406 Koplo Emmanuel Mabula, D 8289 DC Michael Shonza, D. 2300 Abeneth Saro, D.4656D/Koplo Rajabu Bakari na D.1317D/XP Festus Gwasabi. 

Wote walidaiwa kuwa Januari 14, mwaka 2006 walihusika katika mauaji ya wafanyabiashara watatu wa madini wa Wilaya ya Ulanga, mkoani Morogoro; ambao ni Ephraim Chigumbi, Sabinus Chigumbi na Mathias Lunkombe pamoja na dereva wa teksi, Juma Ndugu, mkazi wa Dar es Salaam kwa madai ya kwamba walikuwa ni majambazi.

HABARI NA MUHIBU SAID

CHANZO: NIPASHE