MATUMIZI YA ANASA YASIWAFANYE WASANII WATUMWA WA WAUZA DAWA ZA KULEVYA

NAKUMBUKA muziki wa kizazi kipya ‘Bongo fleva’ ulivyotoka mbali, tangu enzi za Gangwe Mob, Sugu akiitwa ‘2 Proud’, Big Dog Pose, Hard Blasters, Balozi Dolar Soul, Mr Paul na wengine wengi sana ambao walikuwa wakighani na kuimba kipindi hicho.

Ni ukweli usiopingika kuwa wanamuziki walioanza kuimba kipindi hicho walipata shida sana kwa kuimba pasipo kujua kuwa muziki wanaoutengeneza ni pesa, lakini inakosa thamani kutokana na uelewa duni wa mashabiki ambao walikuwa bado hawajaukubali.

Katika harakati zao za kimuziki, wasanii hao waliweza kuimba bure kwa kipindi chote hicho na hata wale waliofanikiwa kutoa albamu hawakuweza kuuza kwa kiwango kile kinachofikiriwa.

Hiyo ilitokana kuwa wapenzi wengi wa muziki kwa kipindi hicho walikuwa ni wale wasio na kazi na watoto wa mama ambao wanakaa nyumbani na kutoka mashuleni.

Lakini hali ilibadilika kwa kipindi cha miaka ya tisini mwishoni na mwanzoni mwa mwaka 2000, ambapo Niger Jay (Prof Jay) alifanikiwa kubadilisha mtazamo wa wanajamii.

Chemsha bongo ndio ilikuwa nyimbo ambayo inatamba sana akiwa na kundi la Hard Blasters, ambalo lilikuja kuwa tishio kwa muda mfupi na kupotea.

Jay mara baada ya kutoa wimbo huo ndio ukaweza kubadilisha mtazamo na kuongeza mashabiki wa kila rika katika muziki wa bongo fleva.

Mara baada ya wimbo huo ndipo mapinduzi ya muziki pesa yakaja katika muziki huu bongo fleva.

Kipindi cha mapinduzi hayo maproduza waliweza kufaidika sana kwa kuwapa wasanii lebo ya kurekodi bure kisha kugawana fedha za albamu.

Wasanii walipunjwa sana kipindi hicho na Wahindi kutokana na uelewa mdogo wa soko juu ya suala la muziki.

Lakini ilipofika hatua wakagundua kuwa wananyonywa kila msanii aligoma kutoa albamu na kuanza kuimba nyimbo moja moja.

Nyimbo hizo zilifanya vizuri katika soko na kuwapatia fedha nyingi za kutosha kupitia shoo mbalimbali walizokuwa wanafanya.

Mapinduzi ya kutegemea shoo yamekua sasa mpaka hatua ya kuwa na video bora katika luninga zetu kiasi cha kufikiria soko la Magharibi.

Hali hiyo imekwenda sasa kwa wasanii hao kuacha tena kufikiria muziki na baadaye kugeuka ni watu wa kutumiwa na wajanja wa mjini kutokana na majina yao.

Wasanii wengi wamekuwa vishoka vya wafanyabiashara wa madawa ya kulevya na kutamani kuwa na pesa nyingi kiasi cha kujiingiza katika biashara hiyo haramu.

Hili limebainika kutokana na kuamini kuwa majina yao makubwa yanahitaji pesa nyingi za matanuzi, hivyo wasipokuwa nazo wataaibika.

Jambo ambalo nawaambia si kweli bali wanachotakiwa kutengeneza mazingira mazuri kwenye muziki wao ili wafanikiwe.

Nawashauri wasanii wa muziki huu wa kizazi kipya kutumia vizuri mapato yao ambayo wanapata kwa sasa ili kujijengea maisha yao ya baadaye.

Kwani kushinda baa kila siku na kutembelea magari makubwa ya kuazima kwa gharama kubwa si ujanja, bali wanatakiwa kuangalia wapi wataongeza masoko yao ya sanaa.

humphreyshao@ymail.com 

0716 -772231
MTANZANIA