HATMA YA MAKADA WA CHADEMA LEO

MAHAKAMA Kuu Kanda ya Tabora leo inatarajiwa kutoa uamuzi wa hoja za kisheria na kupanga tarehe ya usikilizwaji wa shauri la maombi ya marejeo katika kesi ya ugaidi inayowakabili wanachama watano wa Chama cha Demokrasia na Maendeleo (CHADEMA).

Shauri la maombi ya marejeo liliwakilishwa na wakili wa utetezi, Peter Kibatala, akiiomba mahakama kuu ipitie majalada ya kesi  mbili dhidi ya wateja wake zilizofunguliwa mahakama za chini  na kuyatolea maamuzi kwamba zimeshindwa kutimiza wajibu wake.

Wakili Kibatala alibainisha katika maombi hayo kwamba uamuzi huo wa mahakama za chini, umeathiri pia haki za waomba rufaa ikiwamo haki ya kupata dhamana.

Wiki iliyopita Jaji wa mahakama hiyo, Simon Lukelelwa, aliahirisha usikilizwaji wa shauri hilo baada ya kutokea ubishani wa kisheria kati ya Wakili wa Serikali, Juma Masanja na Wakili wa utetezi, Kibatala.

Jaji Lukelewa alifikia uamzi huo mara baada ya kukubaliana na maombi ya Wakili Masanja kwamba walichelewa kupata nakala ya maombi yaliyowasilishwa mahakama kuu na wakili wa utetezi.

Katika maombi yake wakili wa serikali aliiambia mahakama hiyo kuwa walipokea nyaraka hizo Julai 19, mwaka huu, hivyo haikuwa rahisi kuweza kuzijibu.

Pia aliomba apewe nakala za mashauri mawili yaliyofunguliwa katika mahakama za Wilaya ya Igunga na ile ya Hakimu Mkazi wa Mkoa.

Jaji Lukelelwa aliutaka upande wa serikali uwe umejibu hoja hizo kabla ya jana ili leo aweze kutoa uamuzi na kupanga tarehe ya kuanza usikilizwaji wa shauri la maombi ya marejeo lililowasilishwa na Wakili Kibatala.

Watuhumiwa hao watano ni Kaimu Katibu  wa CHADEMA Mkoa wa Dar es Salaam, Henry Kileo, Evodius Justian, Oscar Kaijage, Seif Kabuta na Rajab Kihawa.

Wote kwa pamoja wanakabiliwa na mashtaka mawili ya kudaiwa kumjeruhi Mussa Tesha kwa kutumia tindikali na kutenda vitendo vya kigaidi chini ya kifungu cha nne cha sheria.

NA TANZANIA DAIMA