DKT. SHEIN ATOA ONYO KALI KATIKA MFUNGO HUU WA RAMADHAN

Rais wa Zanzibar na Mwenyekiti wa Baraza la Mapinduzi, Dk. Ali Mohamed Shein aliyasema hayo katika risala ya mwezi Mtukufu wa Ramadhani aliyoitoa kwa wananchi kupitia vyombo vya habari.

 

Na Rajab Mkasaba, Ikulu

SERIKALI haitovumilia kuona watu wanaohatarisha maisha na afya za wengine kwa kuwauzia bidhaa zilizopitwa na wakati, mbovu,bei ya juu na zisizokuwa na vipimo bora hasa katika mwezi Mtukufu wa Ramadhani.

Dk. Shein alisema wakati watu wanatafuta riziki katika mwezi huu wanapaswa kuzingatia haki na kuhurumiana katika biashara.

Alisema inafahamika kuwa faida kwa mfanyabiashara ni lazima, ili aweze kujimudu na kuendelea lakini wakati huohuo akumbuke kufanya biashara bila ya kupitisha hadaa.

Kutokana na hali hiyo, Dk. Shein aliviagiza vyombo husika kuchukua hatua madhubuti kuhusu masuala ya biashara sambamba na mazao ya kilimo, kama ndizi zinazouzwa sokoni zikiwa changa.

Alitoa wito kwa wananchi wote kuhurumiana kwa njia mbali mbali hasa katika kutoa sadaka kwa wasiojiweza, mayatima, masikini, wanafunzi waliopo daghalia, wagonjwa waliopo hospitali na watu wengine wanaotaka kusaidiwa angalau kwa futari.

Dk. Shein aliwataka wananchi kuzifuata taratibu zote alizoziagiza Mwenyezi Mungu na Mtume wake ikiwa ni pamoja na kuondoa sababu zote za utengano na mifarakano na badala yake waimarishe umoja, mshikamano, ihsani na kupendana.

Alisema Ramadhani imekuja wakati wa msimu wa utalii, hivyo ni vyema kuwa na subira na kuwaongoza wageni juu ya taratibu, mila na kanuni zilizopo nchini katika mwezi huu bila ya bughudha au uvunjaji wa sheria.

Aliwafahamisha wafanyabiashara wa vyakula, mahotelini na mikahawani kuwa wanapaswa kuheshimu khulka, mila na utamaduni wa Zanzibar na kutofanya mambo ya karaha yatakayopelekea kuwakasirisha wanaofunga.

Aliwataka wasiofunga kuwaheshimu wanaofunga na hatimae kuifanya Ramadhani iwe kivutio cha wageni kwa utamaduni na ustaarabu wa Zanzibar.

Aliwahakikishia wananchi kuwa Mamlaka ya Maji Zanzibar (ZAWA) itafanya kila juhudi ili kuhakikisha maji yanapatikana katika maeneo mbali mbali.

Dk. Shein alitoa wito kwa wananchi wote kuwa waangalifu na kutumia vyakula na maji bila ya israfu.

Katika risala hiyo Dk. Shein alimuomba Mwenyezi Mungu kuijaalia Ramadhani kuwa yenye mafanikio, kuanzia kwa wafanyabiashara, wakulima, wavuvi, washoni, waendeshaji darsa za dini, vijana, wazee na wananchi wote kwa jumla.

Chanzo - ZanziNews