UKOSEFU WA AJIRA NCHINI: 75% ya watanzania wako sekta zisizo rasmi

ZAIDI ya asilimia 75 ya Watanzania wenye uwezo wa kufanya kazi wanajihusisha katika sekta isiyo rasmi.  

Kauli hiyo imetolewa kutokana na kiwango kikubwa cha ukosefu wa ajira nchini kuzidi kushika kasi hali inayoendelea kuzitesa nchi za Afrika Mashariki na za kusini mwa Jangwa la Sahara.

Mkurugenzi wa Idara ya Kazi na Ajira katika Wizara ya Kazi na Ajira, Ally Msangi alikuwa akizungumza katika kikao kilichowakutanisha wadau mbalimbali kujadili hali ya soko la ajira duniani.

Msangi alisema utafiti utakaofanywa utagusa sehemu kubwa ya nguvu kazi na utaiwezesha serikali kupata picha halisi ya hali ya ajira nchini.

Utafiti huo utatoa taarifa kuhusu hali ya ajira nchini katika sekta isiyo rasmi, utumikishwaji wa watoto, hali ya hifadhi ya jamii, hali ya kipato nchini na matumizi ya muda na ajira mpya zilizozalishwa katika sekta zote kwa kipindi cha 2006-2013.

“Katika kufikia dira ya maendeleo ya taifa (Vision 2025) Tanzania imejiwekea mikakati mbalimbali ikiwamo kukuza uchumi na kupunguza umaskini Tanzania (MKUKUTA) wenye malengo ya kuhakikisha kiwango cha ukosefu wa ajira kinapungua, utumikishwaji wa watoto unapungua na ajira isiyo timilifu inapungua.

“Utafiti huu pekee wa hali ya nguvu kazi nchini ndiyo unaweza kutoa hali halisi ya viashiria hivyo ili kufikia malengo na maendeleo tunayoyahitaji,” alisema Msangi. 

Alisema imebaki miaka miwili kufikia hitimisho la tathmini ya malengo ya maendeleo ya millenia (MDGs) mwaka 2015 ambako nchi inapaswa kutoa taarifa ya viwango vya viashiria vya malengo hayo hususani katika MDGs.

“Wote ni wadau nuhimu katika mchakato huu kwa kuwa masuala ya ajira na kazi ni masuala mtambuka ambayo juhudi za pamoja zinahitajika kati ya serikali,t aasisi za elimu, taasisi za utafiti ,wawekezaji, mashirika yasiyo ya serikali,w abia wa maendeleo,waandishi wa habari na wananchi kwa ujumla ili kufikia malengo tuliyojiwekea,”alisema Msangi.